لي تتحماق على البيتزا وتتبغيها تكون مجبدة وتتعلك تدخل وبالزربة

0 334

حبيباتي في الله اشخباركم واشخبار وليداتكم وكل عزيز عندكم نتمنى من الله تكونوا في احسن الاحوال يارب امين
اليوم بادن الله تعالى جبت ليكم بيتزا معتبرة واحسن الف مرة من تاع البيتزيريات تتجي فنة وخفيفة وتتعلك بالفرماج هنا غنعطيكم السر تاع العجين وكدلك تاع الفرماااج ومغنخبي عليكم والووووو كي ديما هههههههههه ندوزوا للطريقة والمقادير بلا منكتر فالزوااق هههههههههههههه

بسم الله وعلى بركة الله
المهم المقادير تتبق على حسب افراد العائلة انا تنعمل العجين كتير ونخليه فالفريكو ملي تنبغيها تنجبدها واحد 3 سوايع وهاني خادمة بيها
كيلو فورص
ملح شوية الخميرة تاع الخبز شوية الزعتر
كاااس تاع الزيت العوووود يكون عااامر نيت
كاس تاع الماء او اكتر هد الاخير على حسب نوعية الدقيق

الطريقة
تنعمل الفورص الملح الزعتر والزيت العود وتنخدمهم بيدي وتنزيد الماء دافىء تدريجيا وتنخليها مرخوووفة
تنبق نعرك فيها وانا تنزيد الماء وخا تشوفوها مطلوقة متخافوووش محدكم تتعركوها وهي تتشد فراسها وتتحسي بيها رطبة مزيان بين يديك ومتتلصقش يعني كل مرة تنبق نزيد الماء حت تنحس بيها مرخوفة مزيان وبلا منوصل للدقيق يعني متنزيدش فيها الدقيق نهائيا هي بوحدها تتجمع
نقسمها ونخليها تخمر كل كورة غنخرج منها 2 بيتزات على حسب الطبسيل لي عندي غي نصف ساعة المهم على مانوجد ليها التعميرة ديالها

ندوزوا دبا للحشوة على حسب رغبة كل وحدة

انا استعملت هنا غي فلفلة مقطعة صغيرة مربعات
الموزريلا محكوكة فالحكاكة الغليضة
الدرة مصبرة
شوية تاع الشومبينيو
الطون
وبطبيعة الحال لاصوص انا تناخد غي حك تاع مطيشة معلبة وتنعمل معاها ملح ابزار كمون تحميرة ودريس توم وشوية زيت العود متنكترش منو تنزيد عليها شوية الماء فاش طيب لي لاصوص وتنخليها حت تتوقف وتنخدم بيها
نسرح العجين بالمدلك رقيقة بحال شكل البطبوط تاع التعمار
نتكها بالفورشيط مزيااان
خديت العجين دهنتوا بلاصوص
رشيت شوية الموزريلا
عمرت بالحشوة لي عندي
وعملت للمرة التانية الموزريلا بكترة
دخلتها للفرن تاخد حقها من العافية انا تنشعل غي البلاصة لي غطيب لي لي العجين من التحت الفوق متنشعلوش تيتحمر الوجه بوحدوا غي من الصهد تاع الفرن
هاهي ملي وجدات رشيت عليها شوية الزعتر وسقيتها بزيت الزيتون حاااااار يعني مرقدة فيها العويفية تاع الفلفلة هههههههههههه
شوفوا كي تجبد علي وتتعيط علي بالزعط ههههههههههههههههههه
المهم حت تجربوها وتردوا علي الخبار واش نيت بيتزا تاع الزنقة كاملة مكمولة او غي تاعي انا هههههههههههههه

قد يعجبك ايضا

شاركنا برأيك لكي ترتقي بقلمك

لن يتم نشر عنوان بريدك الإلكتروني.