لاصوص اللي كندير في الباط وسباكيتي وفي البيتزا بلا منضيع القشرة

0 33

جبت ليكم مقادير الصوص اللي طلبو مني البنات…
بالنسبة لمطيشة كناخدو ديك مطيشة اللي كتكون طويلة عنت كيكون فيها الماء قليل, كنقشروها ونقطعو مطيشة طراف صغار ونديروها فوق البوطة طيب شوية من بعد كنزيدو القياس ديال الملح وفي هاد اللحظات نمشيو نقطعو الفلفلة حارة والثومة ونكرضوهم طريفات صغار فاش كتغلى مطيشة شوية كنرمي الفلفلة ومن بعد الثومة ونخليهم يغلاو مع مطيشة شي 10 دقايق او اكثر من بعد كنزيد الخل التفاح بالنسبة ل7 كيلو درت كاس ديال العنبة نخليه يزيد يغلى شوي ونطفي عليه ونرمي المعدنوس مقطع ونحرك مزيان ونعمر القراعي وهو سخووون ونسد
انا كنحتافظ بالقراعي والغلايق كنشريهم جداد كل عام كنفرش شي حاجة ونقلبهم ونغطيهم ونخليهم حتى الغد ليه ونشوف الى لقينا الصوص خرج هذا يعني أنه يجب استهلاكه والى مادازت حتى نقطة نحتافظ بيه في البلاكار عادي وراه تايبقى حتى يفوت العام , كنستعملوه كطبق جانبي مرافق
الحرورة كنتحكمو فيها ومن الاحسن تكون معتدلة وهاكا كيعجبني فاش نحلو القرعة نحتافظو بالباقي في الثلاجة كينفع هاد الصوص في أيام فصل الشتاء اللي كتكون فيه مطيشة مابنيناش وكلها هرمونات وقليلة وغالية كيجي بنين ونتمنى تجربوه انا مابقيتش كنستغنى عليه وبالنسبة لبناتي صوبتو ليهم بالفلفلة حلوة فاش تصوبوه من الاحسن ماتحلوهش دغيا خليوه يدوز عليه 15 يوم على الاقل وكلما طوالت المدة كلما كان بنين بالنسبة للقشرة ماتلوحوهاش طيبوها بلاماتزيدو ليها الماء وفاش تبرد ديروها في كسكاس وعصروها بايديكم وحتافظو بيها في الثلاجة لحين وقت الاستعمال انا خرجات لي قرعة ونص ودابا 20 يوم مخسر ليها والو كنستعملها في الصوص اللي كندير في الباط وسباكيتي وفي صوص البيتزا يعني مكاضيعش القشرة.

قد يعجبك ايضا

شاركنا برأيك لكي ترتقي بقلمك

لن يتم نشر عنوان بريدك الإلكتروني.