شكون تعشا معايا بريوات بالكفته والخضرة لذاذ بزاف وحريرتي المحرحرة ماكنشبعش منها

بريوات بالكفتة والخضرة
كنشحر بصيلة فشوية دالزيت وكنضيف علي خيزو محكوك وكورجيت محكوكة وكنغطيها طيح شوية عاد كنضيف الكفته فاش كطيب كنكون فزكت الفيرميسيل فالماطايب كنصفي ونقطعها ونضيفها مع الكفته وندير ملح ابزار صوص صوجة هريسة وكنخليه ينشف فاش كيبرد كنزيد عليه الفروماج احمر وكنعمر الورقة ديالي فاش كنكمل كندهنهم بالزبدة وندخلهم الفران

بالنسبه الحريرة
فالكوكوت كندير شوية زيت الزيتون وطريفات داللحم غير شوية وبصيلة صغيرة محكوكة قزبر ومعدنوس مقطع رقيق تقريبا زلافة وكرافس مقطع حتى هو زلافة الحمص يكون ديجا مفزق قبل بليلة ( انا كندير بقشرتو ) ملح ابزار خرقوم اسكنجبير كندير معلقة كبيرة منو وكندير واحد ربع كاس دالماء ونشحرو غير بضع ثواني باش داك لحم يشرب العطرية صافي كنزيد الماء شوية ونسد الكوكوت تقريبا ربع ساعة فالاثناء كناخد 4 حبات مطيشة كنغسلهم نقطعهم انصاف بقشرتهم وندير معاهم نص كاس دالما ونغطيهم نديرهم يطيبو
على عافية مهيلة هكا كتجي ديك مطيشة حمرا بزاف وبنينة صافي كنطحنها ونقي واحد كاس صغير تقريبا دالعدس نغسلو ونزيدهم فالكوكوت ونضيف الما الى خاص ونخليهم يطيبو عاود عمركم ديرو كولشي فخطرا حيت مطيشة كتوقف الطياب دالحمص وماكيجيش طايب مزيان والعدس الى درتيه من الاول مع الحمص دغيا كيطيب العدس وكطيرلو القشرة كيخيب الحريرة
مهم فاش كيطيبو نعمر الما مزيان وماكنسدش الكوكوت فاش كيغلي كندورها
كناخد الدقيق نغربلو ونضيف معاه عصير نص حامضة وكندير الما الكافي نخلط مزيان ونبدا نفرغ ونحرك مزيان باش مايتكورش وعينك ميزانك ماتكتروش الدقيق حيت ماحدها كطيب وهي كتعقاد كنضيف مطيشة دالحك كنطلقها بشوية دالما فاش يطيب الدقيق شوية واحد 10 دقايق تقريبا ضيفو شعرية متوسطة كنغسلها انا عاد كنديرها صافي ديرو عافية متوسطة وبداو تحركو حتى طيب وتحيد ديك كشكوشة ديال الدقيق
كنكون مقطعة واحد حفنة ديال معدنوس كنطفي البوطة وكنرميه ونسد ونخليها تبرد شوية كنقدمها مع الحامض وبالصحة والراحة

قد يعجبك ايضا أكثر من مؤلف

شاركنا برأيك لكي ترتقي بقلمك

لن يتم نشر عنوان بريدك الإلكتروني.