دخلي نوريك كيفاش رجعلي شعري رطب من بعد ما كان ناشف و حالتو حالة

أولا فقت مع الصباح وخديت الزبدة اااااااايه الزبدة تكون شوية لينة ماشي دايبة ماشي قاصحة وقسمت شعري على 2 وبديت ناخد بالخصلة بالخصلة كندير فيها الزبدة وكنمشطها بالمشطة الرقيقة راها باينة في الصورة باش الزبدة تدخل لكل زغبة دهنت شعري كلووووووو مزياااااان بالزبدة ومشطت مزيااااان يعني يكون الشعر كلو مدهون ماشي تديريها من الفوق وتقولي ما دارت والو اوا من بعد درت البوني او بلاستيكة الى ما كانش عند وكتخليها في شعرك النهار كلو ما تغسلي ما والو
ثانيا بالليل قبل ما ننعس خديت نص ديال لافوكا تكون طايبة مزيااااان بحال اللي في الصورة الى كان شعرك قصير ديري غي ربع حيدي منها القشرة ومعكيها مزياااااان بالفورشيط وبقاي تضيفي الزيت البلدية ضروري الزيت البلدية تقريبا واحد نص كاس حتا تشرب لافوكا
الزيت وعاود ديريها على شعرك خصلة بخصلة بحال كيفاش كيديرو الترطيبة (ما تغسليش شعرك من الزبدة) ورجعي البوني او الميكة وغطي شعرك بزيف حياتي وخليها حتا الصباح
ثالثا في الغد ليه غسلي شعرك عادي بالشمبوان وحاولي ما يكون الما طايب يكون غي دافي شوية ونشفي شعرك بالفوطة ودهني بشوية الزيت اللي عندك انا درت زيت الزنجلان صاوبتو في الدار ودوري شعرك في الفولار وباليل عاود ملي تبغي تنعسي دوريه الجهة التانية
الغد ليه غادية تلقاي شعرك حرير حرير حرير وهادي من تجربتي الخاصة والله العظيم
انا درتها التلاتاء وغسلت الاربعاء واليوم الخميس لقيت شعري ولا رطاااااااب وعاود درت الزبدة ولكن ما غطيتش راسي لحقاش مازال غادا نعاود الوصفة غدا ونغسل بالسبت باش نرتاح من دهين الشعر كل ساعة
نتمنا تجربوها وتردو عليا الخبار وشي دعيوة الخير
من نتي زوينة

قد يعجبك ايضا أكثر من مؤلف

شاركنا برأيك لكي ترتقي بقلمك

لن يتم نشر عنوان بريدك الإلكتروني.