الصلصة السحرية والسريعة التحضير توجد ف 8دقائق لكل الإستعمالات

نزولا عند طلبات بعض الاخوات غادي نحط موضوع الصلصة السحرية و السريعة التحضير.انا كنسميها الصلصة العجيبة حنت عجباتني بزاف من نهار قيدتها عندي وانا كنستعملها غير هي سواء لبيتزا او Les pâtes او كفتة اللحم او كفتة السردين او كطبق مرافق مع الحوت مقلي او الدجاج مشوي او اللحم مبخر او لشنيك كووووووووووولشي و خلاص.

بسم الله
اللهم صل على محمد و على ال محمد كما صليت على ابراهيم و على ال ابراهيم وبارك على محمد وعلى ال محمد كما باركت على ابراهيم و على ال ابراهيم في العالمين انك حميد مجيد

المقادير :
• 4 مطيشات (بزريعتهم وقشورهم)
• 2 بصلات صغار او 1 كبيرة (هادو منقين)
• ربيع(قزبور ومعدنوس)
• 3 ضروس تومة(منقين)
• 2 فلفلات حلوين
• ملح + بزار + تحميرة + زيت المائدة + زيت الزيتون (كتر من المائدة) + نص ك ص ماء

الطريقة :
كنديرو الكل فالكوكوط كيف كتلاحضو انا زدت معاها وريقة سيدنا موسى(الرند) حنت بغيتها للحوت
كنسدو عليها 8 د فقط فوق نار متوسطة هاهي طابت
ونطحنوها فالطحانة د مطيشة وهاهي واجدة.بعد المرات كنزيد عليها مطيشة دالحك ونطبخها شوي يلا بغيت نديرها لسباكيتي (les pâtes en général) ويني بلا فلفلة حلوة
كيف قلت صالحة لكل الاستعمالات
انا هادي لي صورت ليكم درت بيها طويجين
هاهو منقولش ليكم على لدة كتجي فيها حتى تجربوها
كنطلب منكم تجربوها لانني اكيييييييييدة ماغاديش تبقاو تستغناو عليها بحالي انا بعد المرات حتا كندخلو للدار معطلين عاد كنديرها هي و ليبات les pâtes لعشا رمشة عين كيوجدو بجوج ماكاين لا قشري ولا حكي هههه
في امان الله

قد يعجبك ايضا أكثر من مؤلف

شاركنا برأيك لكي ترتقي بقلمك

لن يتم نشر عنوان بريدك الإلكتروني.